Sabangan sa Gingoog

SYNOPSIS 

(Sabangan sa Gingoog)

Niadtong unang panahon, adunay usa ka suba nga ginganlan ug Gingoog. Dinhi niining subaa, adunay usa ka sabangan nga gipuy-an sa mga Higaonon nga pinaguluhan ni Apo Linggawan, usa ka malantip ug makatarunganon nga datu. Aduna siyay anak nga ginganlan ug Kamba nga mao na lamang ang kabilin sa iyang asawa tungud kay namatay kini sa pagpanganak sa naulahi.

Magsugod ang sugilanon sa sabangan diin usa ka Kaliga ang gipasiugdahan alang sa pagpasalamat sa mga diwata ug sa Magbabaya. Miabot ang mga kaalyado ni apo Liggawan nga mga datu sa laing mga katilingban sama ni Datu Dugsoon (uban ni Kaligda, ang iyang sinaligan) ug uban pang mga datu. Si Kaligda, hinigugma sa pag-umangkon ni Apo Linggawan nga si Lid-ongon. Gikatakda silang magkahiusa sa sunod nga takdol sa bulan. Didto usab si Apo Lagawlaw, datu sa Luwan nga higala usab ni ApoLinggawan. Iyang gibalita nga taliabot si Pignanawan, usa ka bandido. Nangandam ang mga katawhan sa sabangan apan wala moabot si Pignanawan.

Usa ka gabii nga wala nila damha, niabot si Pignanawan ug gidagit ang mga babaye kauban si Lid-ongon. Sa pagkahisayod niya niini, miapas si Kaligda kang Pignanawan nga nahimong kaalautan niya. Si Kamba, nga misunod diay kang Kaligda, migawas sa iyang gitagoan.  Isip pagtamod sa kaisog ni Kaligda, iyang gibuhian si Lid-ongon. Isip hulip kaniya, iyang gibihag si Kamba dala ang pagbaod ng kung sundan siya ni Apo Linggawan, kamatayon ni Kamba ang iyang itugbang.  Naglibog si Apo Linggawan. Dili niya mahimong i-ula ang kinabuhi ni Kamba nga mao na lamang ang iyang bahandi. Nagkahiusa ang tanan nga si Apo Lagawlaw na lamang ang paglaum aron luwason si Kamba.

Miapas si Apo Lagawlaw ug mga kauban sa Lasang sa Lumot – usa ka gikahadlokan nga lugar nga gitohoan nga gipuy-an sa mga anino sa dulom. Didto nagharong ang duha ka grupo nga nahimong katapusan ni Pignanawan ug mga kauban.

Usa ka makalandang ang gitukod sa sabangan aron magsilbing talamdan sa kadaugan sa matarong batok sa dautan. Nagkasabot ang mga datu ug mga katilingban nga dang-ulan si Apo Lagawlaw nga mahimong pamuno nilang tanan, sa usa ka mas dako nga lugar nga gihatagan sa ngalan sa dakong suba, ang Gingoog.